امریکی صدر ڈونلڈ ٹرمپ نے آبنائے ہرمز میں پھنسے بحری جہازوں کو نکالنے کے لیے شروع کیے گئے فوجی آپریشن ’’پراجیکٹ فریڈم‘‘ کو عارضی طور پر روکنے کا اعلان کر دیا ہے۔ صدر ٹرمپ کے مطابق یہ فیصلہ پاکستان اور دیگر ممالک کی درخواستوں کے ساتھ ساتھ ایران کے ساتھ ہونے والے اتفاقِ رائے کے بعد کیا گیا۔
امریکی صدر نے اپنے بیان میں کہا کہ خطے میں کشیدگی کم کرنے اور انسانی جانوں کے تحفظ کے پیش نظر آپریشن کو وقتی طور پر معطل کیا جا رہا ہے، تاہم ایران کے خلاف امریکا کی ناکہ بندی پوری قوت اور اثر کے ساتھ جاری رہے گی۔
صدر ٹرمپ کا کہنا تھا کہ امریکا خطے میں بحری گزرگاہوں کے تحفظ اور عالمی تجارت کی روانی کو یقینی بنانے کے لیے پرعزم ہے۔ دوسری جانب مبصرین کے مطابق اس پیشرفت کو خطے میں کشیدگی میں وقتی کمی کی علامت قرار دیا جا رہا ہے، تاہم ایران اور امریکا کے درمیان تنازع بدستور عالمی توجہ کا مرکز بنا ہوا ہے
