ایران کے سپریم لیڈر آیت اللہ مجتبیٰ خامنہ ای نے امریکا اور اسرائیل کے خلاف سخت مؤقف اپناتے ہوئے کہا ہے کہ ایران نے جارح امریکا کو ایسا ’’سخت تھپڑ‘‘ رسید کیا ہے کہ اب امریکا کو خطے میں فوجی اڈوں اور مداخلت کے لیے محفوظ پناہ گاہ میسر نہیں ہوگی۔
حج کے موقع پر اپنے خصوصی پیغام میں ایرانی سپریم لیڈر نے کہا کہ ’’اللہ اکبر‘‘ کے ہتھیار نے ایرانی قوم کو طاقت اور استقامت عطا کی۔ انہوں نے کہا کہ مستقبل امتِ مسلمہ اور نئی اسلامی تہذیب کا ہے، جبکہ اسلامی ممالک کو ترقی، استحکام اور خوشحالی کے لیے باہمی دوستی اور تعاون کو مزید مضبوط بنانا ہوگا۔
آیت اللہ خامنہ ای نے دعویٰ کیا کہ ایران نے دشمن کے اہداف کو ناکام بنایا اور امریکا کو خطے میں اپنی پالیسیوں میں ناکامی کا سامنا کرنا پڑا۔ ان کا کہنا تھا کہ خطے کے ممالک اب امریکی فوجی اڈوں کے لیے ’’ڈھال‘‘ نہیں بنیں گے۔
ایرانی سپریم لیڈر نے اسرائیل کو بھی تنقید کا نشانہ بناتے ہوئے کہا کہ ’’متزلزل صیہونی حکومت اپنی عمر کے آخری مراحل کے قریب پہنچ چکی ہے۔‘‘
یہ بیان ایسے وقت میں سامنے آیا ہے جب مشرقِ وسطیٰ میں ایران، امریکا اور اسرائیل کے درمیان کشیدگی میں مسلسل اضافہ دیکھا جا رہا ہے۔
