اسلام آباد میں تعینات ایرانی سفیر رضا امیری مقدم نے امریکا کے ساتھ کسی بھی قسم کے براہِ راست یا بالواسطہ مذاکرات کی سختی سے تردید کر دی ہے۔
اپنے بیان میں ایرانی سفیر نے کہا کہ پاکستان سمیت بعض دوست ممالک تہران اور واشنگٹن کے درمیان رابطوں اور بات چیت کی راہ ہموار کرنے کی کوشش کر رہے ہیں، اور امید ہے کہ یہ سفارتی کوششیں مستقبل میں مثبت نتائج دے سکتی ہیں۔
انہوں نے واضح کیا کہ ان کی معلومات کے مطابق ایران اور امریکا کے درمیان نہ تو کسی قسم کی جنگ بندی پر کوئی بات چیت ہوئی ہے اور نہ ہی اس وقت کوئی باضابطہ یا غیر رسمی مذاکرات جاری ہیں۔
رضا امیری مقدم کے مطابق دوست ممالک خطے میں کشیدگی کم کرنے اور جارحیت کے خاتمے کے لیے فریقین سے رابطے میں رہتے ہیں، تاہم موجودہ صورتحال میں کسی مذاکراتی پیش رفت کی تصدیق نہیں کی جا سکتی۔
ماہرین کے مطابق اس بیان سے خطے میں جاری ایران-امریکہ کشیدگی اور غیر یقینی صورتحال مزید واضح ہو گئی ہے، جبکہ سفارتی کوششیں اب بھی ابتدائی مرحلے میں نظر آتی ہیں۔
