اسلام آباد ہائیکورٹ نے راول جھیل کے کنارے پاکستان نیول فارمز اور نیول سیلنگ کلب کو غیر قانونی قرار دینے کا سابقہ فیصلہ کالعدم قرار دے دیا۔ عدالت نے نیول سیلنگ کلب کی عمارت گرانے کا حکم بھی ختم کردیا۔
جسٹس انعام امین منہاس اور جسٹس شاہ رخ ارجمند پر مشتمل ڈویژن بینچ نے سنگل بینچ کے فیصلے کے خلاف درخواستیں منظور کرلیں۔ عدالت نے سابق نیول چیف ظفر محمود عباسی کے خلاف مس کنڈکٹ اور فوجداری کارروائی سے متعلق فیصلہ بھی کالعدم قرار دے دیا۔
2022 میں سابق چیف جسٹس اسلام آباد ہائیکورٹ جسٹس اطہر من اللہ کے سنگل بینچ نے مذکورہ منصوبوں کو غیر قانونی قرار دیا تھا۔ وزارت دفاع، سابق نیول چیف ظفر محمود عباسی اور دیگر نے اس فیصلے کے خلاف اپیلیں دائر کی تھیں۔
ڈویژن بینچ نے قومی خزانے کو نقصان کا تخمینہ لگانے، ملوث افسران سے رقم کی واپسی اور نیول فارمز کی زمین پاکستان نیوی ہیڈکوارٹر کے نام منتقل کرنے سے متعلق احکامات بھی کالعدم قرار دے دیے۔
