کویت سٹی: کویت کی وزارتِ تعلیم نے ایک سیکنڈری اسکول میں متعدد طالبات کے دم گھٹنے کے واقعے کے بعد اسکول انتظامیہ کو تحقیقات مکمل ہونے تک تین ماہ کے لیے معطل کردیا۔
غیر ملکی ذرائع ابلاغ کے مطابق کویت کے وزیرِ تعلیم نے انتظامیہ کی معطلی کے احکامات جاری کیے ہیں۔ وزارت کے مطابق اس اقدام کا مقصد واقعے کی شفاف تحقیقات، طالبات کے تحفظ اور اسکول میں محفوظ تعلیمی ماحول کو یقینی بنانا ہے۔
وزیرِ تعلیم نے واقعے کے فوری بعد متاثرہ طالبات سے ملاقات کی اور ان کی طبی دیکھ بھال کا جائزہ لیا۔ انہوں نے طالبات کی جلد صحتیابی کے لیے نیک خواہشات کا اظہار کرتے ہوئے کہا کہ طلبہ و طالبات کی صحت اور سلامتی وزارت کی اولین ترجیحات میں شامل ہے۔
تحقیقات کے دوران تعلیمی سرگرمیوں میں خلل سے بچنے اور اسکول کے معمولات جاری رکھنے کے لیے نئی عبوری انتظامیہ بھی مقرر کردی گئی ہے۔
رپورٹس کے مطابق واقعے میں بعض طالبات کے ملوث ہونے کا بھی انکشاف ہوا ہے، جن کے خلاف ضابطہ اخلاق کے تحت تادیبی کارروائی کی گئی۔ وزارتِ تعلیم نے مبینہ طور پر پیش آنے والے اقدامات کو سنگین اخلاقی اور نظم و ضبط کی خلاف ورزی قرار دیا ہے۔
