اسلام آباد: وزارت اطلاعات و نشریات نے مکہ معاہدے سے متعلق غیر ملکی خبر ایجنسی کی رپورٹس کو قیاس آرائیوں پر مبنی قرار دیتے ہوئے مسترد کردیا۔
وزارت اطلاعات کی جانب سے جاری بیان میں کہا گیا ہے کہ مکہ معاہدے کے حوالے سے غیر ملکی خبر ایجنسی کی جانب سے شائع کی گئی رپورٹس غیر مصدقہ معلومات اور قیاس آرائیوں پر مبنی ہیں۔
بیان کے مطابق سعودی عرب کے دفاع کے لیے پاکستان کا عزم واضح اور ناقابلِ سمجھوتہ ہے، جبکہ مشترکہ دفاع سے متعلق آپریشنل تفصیلات عملیاتی رازداری کا معاملہ ہیں۔
وزارت اطلاعات نے کہا کہ غیر مصدقہ اور گمنام ذرائع پر مبنی قیاس آرائیوں سے گریز کیا جائے۔ وزارت نے زور دیا کہ من گھڑت اعداد و شمار کے بجائے متعلقہ حکام کے سرکاری بیانات پر انحصار کیا جائے۔
