دورہ انگلینڈ میں قومی ٹیم کی ناقص کارکردگی کے بعد پاکستان کرکٹ بورڈ نے کھلاڑیوں اور سلیکشن کمیٹی کے ارکان سے بھی وضاحت طلب کرنے کا فیصلہ کرلیا۔
ذرائع کے مطابق ناقص کارکردگی اور سلیکشن میں مبینہ بے قاعدگیوں پر پی سی بی نے سلیکشن کمیٹی کے رکن مصباح الحق کو نوٹس جاری کیا تھا۔ بعض کھلاڑیوں کی سلیکشن پر مصباح الحق کے اصرار کے باوجود ان کی جانب سے توقعات کے مطابق کارکردگی نہ دکھانے پر وضاحت طلب کی گئی۔
ذرائع کا کہنا ہے کہ مصباح الحق نے نوٹس کا جواب دینے کے بجائے استعفیٰ دینے کا فیصلہ کیا اور اپنا استعفیٰ بورڈ کو بھجوا دیا۔ وہ اس وقت نوٹس پیریڈ پر ہیں، جس کی تکمیل کے بعد پی سی بی سے الگ ہوجائیں گے۔
واضح رہے کہ انگلینڈ کے خلاف مسلسل دو ٹیسٹ میچز میں شکست کے بعد پی سی بی نے ٹیسٹ اسکواڈ کے سات کھلاڑیوں کو ریلیز کرنے کے ساتھ ہیڈ کوچ سرفراز احمد اور بولنگ کوچ عمر گل کو بھی عہدوں سے ہٹا دیا ہے۔
