کراچی: ایم کیو ایم پاکستان کے رہنما اور وفاقی وزیر صحت مصطفیٰ کمال نے کہا ہے کہ جماعت نے پارلیمنٹ میں اپنا مؤقف پیش کر دیا، آئینی ترمیم بھی پیش کی، تاہم اب عوامی سطح پر جدوجہد کا آغاز کیا جائے گا۔
کراچی میں پارٹی رہنماؤں کے ہمراہ پریس کانفرنس کرتے ہوئے مصطفیٰ کمال کا کہنا تھا کہ ایم کیو ایم پاکستان آئین اور قانون کے دائرے میں رہتے ہوئے اختیارات کو نچلی سطح تک منتقل کرنے کے لیے جدوجہد کرے گی اور تمام آئینی راستے اختیار کیے جائیں گے۔
انہوں نے پیپلز پارٹی کی صوبائی حکومت کو تنقید کا نشانہ بناتے ہوئے کہا کہ سندھ حکومت کراچی کو ملک کے لیے اپنا کردار ادا کرنے کا موقع نہیں دے رہی۔ ان کا کہنا تھا کہ لاہور ترقی کے میدان میں کراچی سے بہت آگے نکل چکا ہے، تاہم سندھ میں بدامنی اور شہری مسائل سنگین صورتحال اختیار کر چکے ہیں۔
مصطفیٰ کمال نے کہا کہ دنیا ترقی کی نئی منازل طے کر رہی ہے جبکہ یہاں بنیادی سہولیات کے فقدان کے باعث بچے گٹروں میں گر کر جان سے ہاتھ دھو بیٹھتے ہیں۔
