پشاور: خیبر پختونخوا کے ضلع بنوں میں سڑک کنارے نصب بارودی مواد کے دو دھماکوں میں 7 افراد جاں بحق جبکہ 3 زخمی ہو گئے۔
پولیس کے مطابق بنوں کے علاقے مرکہ بیرا میں سڑک پر نصب بارودی مواد اچانک دھماکے سے پھٹ گیا، جس کی زد میں آ کر مسافر وین میں سوار 5 افراد جان کی بازی ہار گئے۔
ڈی پی او بنوں یاسر آفریدی نے بتایا کہ پہلے دھماکے کے کچھ دیر بعد ایک اور دھماکا ہوا، جس کے نتیجے میں امدادی سرگرمیوں میں مصروف 2 افراد بھی جاں بحق ہو گئے۔
انہوں نے مزید بتایا کہ دوسرے دھماکے سے ایک گاڑی بھی متاثر ہوئی۔ جاں بحق افراد کی لاشوں اور زخمیوں کو قریبی اسپتال منتقل کر دیا گیا ہے جبکہ واقعے کی تحقیقات جاری ہیں۔
حکام کے مطابق متاثرہ مسافر وین ہاتھی خیل گاؤں سے بنوں شہر کی جانب آ رہی تھی۔
