صدر پاکستان گڈز ٹرانسپورٹ الائنس ملک شہزاد اعوان نے سندھ حکومت سے مطالبہ کیا ہے کہ کراچی ٹرانسپورٹ اتحاد کے جائز مطالبات فوری طور پر تسلیم کیے جائیں۔
اپنے بیان میں انہوں نے کہا کہ کراچی ٹرانسپورٹ اتحاد کے اراکین ای چالان سسٹم، تھرڈ پارٹی انشورنس اور بھاری جرمانوں کے خلاف ہڑتال پر ہیں۔ ان کے مطابق سندھ حکومت اور ٹریفک پولیس کی پالیسیوں نے ٹرانسپورٹرز کو احتجاج پر مجبور کر دیا ہے۔
ملک شہزاد اعوان کا کہنا تھا کہ یہ مسئلہ صرف پبلک ٹرانسپورٹ تک محدود نہیں بلکہ گڈز ٹرانسپورٹرز کو بھی اسی نوعیت کے مسائل کا سامنا ہے۔ انہوں نے کہا کہ ہڑتال کے باعث بسیں، منی بسیں اور کوچز اڈوں پر کھڑی ہیں، جس سے شہریوں کو شدید مشکلات کا سامنا کرنا پڑ رہا ہے۔
انہوں نے دعویٰ کیا کہ پبلک ٹرانسپورٹ کی بندش کے باعث شہری سڑکوں پر پیدل چلنے پر مجبور ہیں، جبکہ پارکنگ میں کھڑی گاڑیوں پر بھی ایک لاکھ روپے تک کے چالان کیے جا رہے ہیں۔
