اسلام آباد: شدید بارشوں اور ممکنہ سیلابی صورتحال کے باعث مختلف متعدی بیماریوں کے پھیلاؤ کے خدشے کے پیش نظر قومی ادارہ صحت (این آئی ایچ) نے ملک بھر میں الرٹ جاری کر دیا ہے۔
این آئی ایچ کے مطابق مون سون بارشوں کے دوران ہیضہ، ٹائیفائیڈ، ملیریا اور ڈینگی جیسی بیماریوں کے پھیلنے کا خطرہ بڑھ جاتا ہے۔ ادارے کا کہنا ہے کہ بارش کا پانی جمع ہونے سے مچھروں کی افزائش میں اضافہ ہوتا ہے، جس سے ملیریا اور ڈینگی کے کیسز بڑھ سکتے ہیں۔
قومی ادارہ صحت نے صوبائی حکومتوں، ضلعی انتظامیہ اور متعلقہ اداروں کو ہائی الرٹ رہنے کی ہدایت کرتے ہوئے کہا ہے کہ مون سون کے دوران وبائی امراض کی نگرانی کے نظام کو مؤثر اور فعال بنایا جائے۔
ایڈوائزری میں خبردار کیا گیا ہے کہ آلودہ پانی اور غیر محفوظ خوراک ہیضہ اور ٹائیفائیڈ سمیت دیگر بیماریوں کے پھیلاؤ کا سبب بن سکتی ہے، لہٰذا عوام حفظانِ صحت کے اصولوں پر سختی سے عمل کریں۔
این آئی ایچ نے شہریوں کو بارشوں کے دوران آسمانی بجلی گرنے، بجلی کے کھمبوں، گرے ہوئے تاروں اور کرنٹ لگنے کے خطرات سے بھی آگاہ کیا ہے۔ ادارے کے مطابق بارش یا سیلاب کے دوران دیواروں اور چھتوں کے گرنے سے جانی نقصان کا خدشہ بھی موجود رہتا ہے۔
ایڈوائزری میں مزید کہا گیا ہے کہ سیلابی صورتحال کے دوران سانپ کے کاٹنے کے واقعات میں اضافہ ہو سکتا ہے جبکہ سیلابی پانی خطرناک انفیکشنز کا باعث بھی بن سکتا ہے۔ اسپتالوں کو ہدایت کی گئی ہے کہ وہ ادویات، اینٹی سنیک ویکسین اور او آر ایس کے مناسب ذخائر یقینی بنائیں۔
