فیفا ورلڈ کپ 2026 کے دوران سعودی عرب کے قومی پرچم کو دیگر ممالک کے جھنڈوں سے مختلف انداز میں پیش کیے جانے نے شائقین اور عالمی میڈیا کی توجہ حاصل کر لی۔
عام طور پر فیفا کے پری میچ پروٹوکول کے تحت شریک ٹیموں کے قومی پرچم میدان میں پھیلا کر پیش کیے جاتے ہیں، تاہم سعودی عرب کے پرچم کے ساتھ مختلف طریقہ اختیار کیا گیا۔ سعودی پرچم کو زمین پر بچھانے کے بجائے ایک بلند اور نمایاں مقام پر آویزاں کیا گیا۔
رپورٹس کے مطابق اس خصوصی انتظام کی بنیادی وجہ سعودی قومی پرچم پر درج کلمہ طیبہ ہے، جو مسلمانوں کے لیے انتہائی مقدس حیثیت رکھتا ہے اور اسلامی عقیدے کی بنیادی علامت سمجھا جاتا ہے۔
سعودی عرب میں مذہبی روایات اور ملکی قوانین کے تحت قومی پرچم کو زمین پر بچھانا یا ایسے انداز میں استعمال کرنا جس سے بے ادبی کا تاثر پیدا ہو، مناسب نہیں سمجھا جاتا۔
اسی مذہبی اور ثقافتی حساسیت کو مدنظر رکھتے ہوئے فیفا اور ٹورنامنٹ انتظامیہ نے سعودی پرچم کے لیے الگ طریقہ کار اختیار کیا تاکہ اس کے تقدس، احترام اور مذہبی اہمیت کو برقرار رکھا جا سکے۔
اس اقدام کو سوشل میڈیا پر بھی خاصی توجہ حاصل ہوئی، جہاں صارفین نے سعودی پرچم کے احترام کے لیے اختیار کیے گئے اس خصوصی انتظام کو سراہا۔
