نائیجر کے صحرائے صحارا میں ایک افسوسناک واقعہ پیش آیا، جہاں گاڑی خراب ہونے کے باعث پھنس جانے والے 50 افراد شدید پیاس اور گرمی کے باعث جان کی بازی ہار گئے۔
ذرائع کے مطابق جاں بحق ہونے والے تمام افراد عیدالاضحیٰ کی تعطیلات کے بعد مالی سے واپس اپنے گھروں کو جا رہے تھے کہ دورانِ سفر صحرائے صحارا میں ان کا ٹرک خراب ہو گیا۔
رپورٹس کے مطابق شدید گرمی اور دشوار گزار صحرائی ماحول میں ٹرک میں موجود پانی کا محدود ذخیرہ بھی ختم ہو گیا، جس کے نتیجے میں بیشتر افراد پیاس کی شدت برداشت نہ کر سکے اور دم توڑ گئے۔
واقعے میں صرف دو افراد زندہ بچ سکے، جنہوں نے پیدل سفر کرتے ہوئے صحرا عبور کیا اور قریبی آبادی تک پہنچ کر امداد طلب کی۔ حکام کی جانب سے واقعے کی مزید تحقیقات جاری ہیں۔
