مقبوضہ مغربی کنارے کے فلسطینی بچوں نے نوبیل انعام یافتہ پاکستانی سماجی کارکن ملالہ یوسف زئی سے ویڈیو کال کے ذریعے گفتگو کرتے ہوئے اسرائیلی مظالم اور تعلیم کے حصول میں درپیش مشکلات سے آگاہ کیا۔ بچوں نے بتایا کہ اسرائیلی قابضین نے اسکول جانے والے راستوں پر رکاوٹیں کھڑی کر رکھی ہیں اور کئی مقامات پر خار دار تاریں لگا دی گئی ہیں، جس کے باعث انہیں شدید مشکلات کا سامنا ہے۔
گفتگو کے دوران فلسطینی بچوں نے اپنے روزمرہ مسائل، خوف اور تعلیمی رکاوٹوں کے بارے میں تفصیل سے بتایا، جس پر ملالہ یوسف زئی نے گہرے دکھ اور افسوس کا اظہار کیا۔ ملالہ نے کہا کہ بچوں کی باتیں سن کر ان کا دل ٹوٹ گیا ہے اور وہ امید کرتی ہیں کہ دنیا ان معصوم بچوں کی آواز سنے گی۔
ملالہ یوسف زئی نے اس بات پر زور دیا کہ ہر بچے کو بلا خوف و خطر تعلیم حاصل کرنے کا حق حاصل ہے اور عالمی برادری کو فلسطینی بچوں کے بنیادی حقوق کے تحفظ کے لیے مؤثر کردار ادا کرنا چاہیے۔
