پشاور کے لیڈی ریڈنگ ہسپتال میں پہلی بار روبوٹک سرجری کا آغاز کردیا گیا۔
تفصیلات کے مطابق جدید روبوٹک سرجری کے آغاز کے بعد مریضوں کو بعض پیچیدہ بیماریوں کے علاج کے لیے اب دوسرے شہروں کا رخ نہیں کرنا پڑے گا۔ پہلی روبوٹک سرجریز ورکشاپ لیڈی ریڈنگ ہسپتال (ایل آر ایچ) کے یورولوجی یونٹ اور برطانیہ سے تعلق رکھنے والے سینئر ڈاکٹروں کے باہمی اشتراک سے منعقد کی گئی۔
ہسپتال کے ترجمان محمد عاصم کے مطابق روبوٹک سرجری ایک جدید اور مؤثر طریقہ علاج ہے جس میں آپریشن ڈاکٹرز ہی کرتے ہیں، تاہم انہیں ایک جدید روبوٹک سسٹم کی مدد حاصل ہوتی ہے۔ اس سسٹم کے ذریعے انتہائی باریک آلات اور ہائی ڈیفینیشن کیمروں کا استعمال کیا جاتا ہے، جو جسم کے اندرونی حصوں کو واضح انداز میں دکھاتے ہیں۔
ماہرین کے مطابق اس جدید ٹیکنالوجی کے استعمال سے پیچیدہ آپریشنز زیادہ درستگی کے ساتھ انجام دیے جا سکتے ہیں اور انسانی غلطیوں کے امکانات میں نمایاں کمی آتی ہے۔ اس کے علاوہ مریضوں کے لیے سرجری کا عمل نسبتاً آسان اور نتائج بھی روایتی طریقوں کے مقابلے میں بہتر ہوتے ہیں۔
ماہرین کا کہنا ہے کہ روبوٹک سرجری نہ صرف علاج کے معیار کو بہتر بناتی ہے بلکہ صحت کے شعبے میں جدید ٹیکنالوجی کے فروغ کا بھی ایک اہم سنگ میل ہے۔
