لاہور سمیت ملک بھر کے نجی میڈیکل اور ڈینٹل کالجز میں بھاری فیسوں کے باعث داخلوں میں نمایاں کمی سامنے آئی ہے، جس کے نتیجے میں درجنوں نشستیں خالی رہ گئیں۔ اس صورتحال کے پیش نظر پاکستان میڈیکل اینڈ ڈینٹل کونسل (پی ایم ڈی سی) نے اہم فیصلہ کرتے ہوئے داخلہ پالیسی میں وقتی نرمی کر دی ہے۔
نئے فیصلے کے مطابق ایم بی بی ایس کا میرٹ 55 فیصد سے کم کر کے 52 فیصد جبکہ بی ڈی ایس کا میرٹ 50 فیصد سے کم کر کے 47 فیصد تک لانے کی اجازت دے دی گئی ہے۔ اس حوالے سے باقاعدہ نوٹیفکیشن بھی جاری کر دیا گیا ہے۔
پی ایم ڈی سی کے مطابق میرٹ میں یہ کمی صرف خالی نشستوں کو پُر کرنے کے لیے عارضی بنیادوں پر کی گئی ہے اور اسے مستقل پالیسی کا حصہ نہیں بنایا جائے گا۔ کونسل نے واضح کیا ہے کہ داخلے میرٹ اور شفافیت کی بنیاد پر ہی کیے جائیں گے اور پورے عمل کی سخت نگرانی بھی کی جائے گی۔
مزید برآں، نجی میڈیکل اور ڈینٹل کالجز کو ہدایت دی گئی ہے کہ وہ فیسوں میں کمی پر بھی سنجیدگی سے غور کریں تاکہ زیادہ سے زیادہ طلبہ کو داخلے کے مواقع فراہم کیے جا سکیں۔
