رمضان المبارک کے دوران طلبہ اور اساتذہ کو سہولت فراہم کرنے کے لیے محکمہ اسکول ایجوکیشن و لٹریسی سندھ نے صوبے بھر کے سرکاری اور نجی پرائمری، سیکنڈری اور ہائر سیکنڈری اسکولوں کے اوقات کار تبدیل کرنے کا نوٹیفکیشن جاری کر دیا ہے۔
نوٹیفکیشن کے مطابق سنگل شفٹ اسکول صبح 8 بجے سے دوپہر 12 بج کر 30 منٹ تک کھلے رہیں گے۔ ڈبل شفٹ اسکولوں میں پہلی شفٹ صبح 7 بج کر 30 منٹ سے 11 بج کر 30 منٹ تک جبکہ دوسری شفٹ 11 بج کر 45 منٹ سے دوپہر 2 بج کر 45 منٹ تک جاری رہے گی۔
جمعہ کے روز سنگل شفٹ اسکول صبح 8 بجے سے 11 بج کر 30 منٹ تک کھلے رہیں گے تاکہ نماز جمعہ کے پیش نظر طلبہ اور عملے کو بروقت چھٹی دی جا سکے۔
محکمے کے مطابق یہ فیصلہ رمضان المبارک میں روزے کی حالت کے پیش نظر کیا گیا ہے، جبکہ تمام تعلیمی اداروں کو نئے اوقات پر سختی سے عمل درآمد کی ہدایت کی گئی ہے اور ضلعی انتظامیہ اس کی نگرانی کرے گی۔
