کراچی میں صوبائی محکمہ ایکسائز اینڈ ٹیکسیشن نے پسندیدہ موٹر رجسٹریشن نمبرز کی نئی فیسوں کا نوٹیفکیشن جاری کر دیا ہے، جس کے تحت مخصوص نمبرز کی قیمت 20 لاکھ روپے تک مقرر کر دی گئی ہے۔
نوٹیفکیشن کے مطابق 786 اور 110 جیسے مخصوص نمبرز حاصل کرنے کے خواہشمند افراد کو 20 لاکھ روپے ادا کرنا ہوں گے۔ تین ہندسوں والے 111 سے 999 تک کے نمبرز کی فیس 10 لاکھ روپے فی نمبر مقرر کی گئی ہے۔
اسی طرح 100 سے 900 تک کے منتخب نمبرز اور 001 سے 009 تک کے نمبرز کے لیے پانچ لاکھ روپے فیس مقرر کی گئی ہے، جبکہ دیگر پسندیدہ نمبرز حاصل کرنے کے لیے تین لاکھ روپے ادا کرنا ہوں گے۔ محکمہ حکام کے مطابق درخواست دہندگان منظور شدہ رقم جمع کرا کے اپنی پسند کا نمبر حاصل کر سکتے ہیں۔
