گورنر خیبرپختونخوا فیصل کریم کنڈی کا کہنا ہے کہ احتجاج، دھرنوں اور سڑکوں کی بندش سے بانی چیئرمین پی ٹی آئی کا علاج ممکن نہیں۔ ایک نجی ٹی وی پروگرام میں گفتگو کرتے ہوئے انہوں نے کہا کہ پی ٹی آئی کے احتجاج میں مختلف مقامات پر 20 سے 25 افراد موجود ہیں اور مجموعی تعداد نہایت کم ہے۔
انہوں نے کہا کہ صوبہ اس وقت سیکیورٹی کے چیلنجز سے دوچار ہے جبکہ صوبائی کابینہ بانی کے علاج کے نام پر احتجاج میں مصروف ہے۔ ان کا دعویٰ تھا کہ صوبائی مشینری مظاہرین کی پشت پناہی کر رہی ہے جبکہ وفاقی حکومت عمران خان کو مناسب طبی سہولیات فراہم کر رہی ہے۔
ایک سوال کے جواب میں فیصل کریم کنڈی نے کہا کہ وزیراعلیٰ خیبرپختونخوا علی امین گنڈا پور خود کہہ چکے ہیں کہ وہ محسن نقوی کے اچھے بچے تھے، جس پر انہوں نے مزید تنقید بھی کی۔
