اسلام آباد: چیئرمین پی ٹی آئی بیرسٹر گوہر نے کہا ہے کہ پارٹی میں کسی قسم کا فارورڈ بلاک موجود نہیں اور عمران خان چیئرمین تھے، ہیں اور رہیں گے۔ انہوں نے کہا کہ عمران خان کے فیصلے کو کوئی سیاسی فورم یا ایپکس کمیٹی تبدیل نہیں کرسکتی۔
بیرسٹر گوہر کی قیادت میں پی ٹی آئی وفد نے اسپیکر قومی اسمبلی ایاز صادق سے اسپیکر آفس میں ملاقات کی۔ ملاقات کے بعد میڈیا سے گفتگو کرتے ہوئے انہوں نے کہا کہ جمعرات تک اپوزیشن لیڈر کا تقرر ہوجائے گا اور اس حوالے سے کاغذات جمع کرادیے ہیں جن کی تصدیق کل تک متوقع ہے۔
اس موقع پر پی ٹی آئی رہنما عامر ڈوگر نے کہا کہ قومی اسمبلی کی ہدایات کے مطابق تقاضے پورے کرکے اپ ڈیٹڈ لسٹ اسپیکر کے دفتر میں جمع کرا دی گئی ہے۔ انہوں نے کہا کہ پارٹی میں کوئی گروپنگ نہیں اور محمود خان اچکزئی کے کاغذاتِ نامزدگی جمع کرا دیے گئے ہیں، وہی ہمارے اپوزیشن لیڈر ہوں گے۔
