اسلام آباد: وزیراعظم شہباز شریف نے ولادیمیر پیوٹن کی رہائش گاہ کو نشانہ بنائے جانے کے واقعے کی سخت الفاظ میں مذمت کرتے ہوئے روس کی حکومت اور عوام کے ساتھ مکمل یکجہتی کا اظہار کیا ہے۔
وزیراعظم شہباز شریف نے اپنے بیان میں کہا کہ ایسے وقت میں جب عالمی سطح پر امن کے لیے کوششیں جاری ہیں، اس نوعیت کے گھناؤنے حملے امن اور استحکام کے لیے سنگین خطرہ ہیں۔ انہوں نے کہا کہ پاکستان سلامتی اور امن کو خطرے میں ڈالنے والے تشدد کے تمام طریقوں کو یکسر مسترد کرتا ہے۔
واضح رہے کہ روس نے دعویٰ کیا ہے کہ نووگورود ریجن میں صدر پیوٹن کی سرکاری رہائش گاہ کو یوکرین کی جانب سے نشانہ بنانے کی کوشش کی گئی، جسے روس نے ریاستی دہشت گردی قرار دیا ہے۔ روسی حکام کے مطابق اس واقعے کے بعد حملے کا جواب دینے اور امن مذاکرات جاری رکھنے کے عمل پر نظرثانی کا فیصلہ کیا گیا ہے۔
روسی وزیر خارجہ سرگئی لاوروف نے بتایا کہ صدر پیوٹن کی رہائش گاہ پر 91 لانگ رینج ڈرون داغے گئے، تاہم تمام ڈرونز کو کامیابی سے مار گرایا گیا۔ انہوں نے کہا کہ روس اس حملے کا جواب ضرور دے گا۔
دوسری جانب روسی صدر ولادیمیر پیوٹن نے ڈونلڈ ٹرمپ سے ٹیلی فونک رابطہ بھی کیا، جس میں امریکا کے ساتھ امن کے لیے تعاون جاری رکھنے پر اتفاق کیا گیا، تاہم امن مذاکرات پر نظرثانی سے بھی آگاہ کر دیا گیا ہے۔
سیاسی مبصرین کے مطابق اس واقعے سے روس یوکرین جنگ میں کشیدگی مزید بڑھنے کا خدشہ ہے، جبکہ عالمی برادری کی نظریں آئندہ روسی ردعمل پر مرکوز ہیں۔
