سکیورٹی اداروں نے بروقت کارروائی کرتے ہوئے کراچی کو بڑی تباہی سے بچا لیا اور دہشتگردوں کی جانب سے خودکش حملے کے لیے تیار کی گئی کم عمر طالبہ کو بحفاظت ریسکیو کر لیا۔ وزیر داخلہ سندھ ضیا الحسن لنجار نے ایڈیشنل آئی جی ایڈیشنل آئی جی سی ٹی ڈی آزاد خان اور کراچی پولیس چیف جاوید عالم اوڈھو کے ہمراہ پریس کانفرنس کرتے ہوئے وزیر داخلہ سندھ ضیا الحسن لنجار کا کہنا تھا سوشل میڈیا کے ذریعے ایک بچی سے رابطہ کیا گیا، دہشت گردوں کی جانب سے کہانیاں سنائی گئیں اور اس بچی کی ذہن سازی کی گئی۔
انہوں نے کہا کوشش کی ہے اس بچی کے اہلخانہ اور ایڈریس کو سامنے نہ لےکر آئیں، حکومت ان کی بہتری کے لیے انتظام اور مدد کرے گی یہ ہماری ترجیح ہے، چاہتے ہیں کہ پہلے اس بچی اور اس کے گھر والوں کی جان کی حفاظت ہو۔
وزیر داخلہ سندھ کا کہنا تھا کہ دہشتگردوں کا بیانیہ جھوٹ پر مبنی ہے اور والدین کو چاہیے کہ بچوں کے سوشل میڈیا استعمال پر کڑی نظر رکھیں۔ ضیا لنجار نے مزید کہا کہ بروقت کارروائی سے بچی کی جان بچائی گئی، حکومت کی کوشش ہے کہ بچی دوبارہ تعلیم کا سلسلہ شروع کرے اور اپنے خواب کے مطابق مستقبل میں ٹیچر بن کر ملک کا روشن مستقبل بنے۔
