اسلام آباد: اٹلی نے پاکستانی ورک فورس کے لیے بڑی خوشخبری دیتے ہوئے آئندہ تین سال کے لیے نوکریوں میں کوٹہ الاٹ کر دیا ہے۔ ترجمان وزارتِ اوورسیز پاکستانیز کے مطابق اٹلی سے مجموعی طور پر ساڑھے دس ہزار نوکریوں کا کوٹہ حاصل کر لیا گیا ہے۔
ترجمان کا کہنا ہے کہ اٹلی نے پاکستان کو آئندہ تین سال کے دوران ہر سال 3,500 افراد کے لیے روزگار کے مواقع فراہم کرنے کی منظوری دی ہے، جس کے تحت 1,500 پاکستانی سیزنل جبکہ 2,000 نان سیزنل کوٹے پر اٹلی جائیں گے۔
وزارت اوورسیز پاکستانیز کے مطابق یہ کوٹہ شپ بریکنگ، ہیلتھ کیئر اور زراعت سمیت مختلف شعبوں میں مختص کیا گیا ہے۔ ترجمان نے بتایا کہ اٹلی یورپ کا پہلا ملک بن گیا ہے جس نے پاکستان کے لیے باقاعدہ طور پر نوکریوں کا کوٹہ الاٹ کیا ہے۔
حکام کا کہنا ہے کہ یہ پیش رفت پاکستانی افرادی قوت کے لیے یورپ میں روزگار کے نئے مواقع کھولنے کے ساتھ ساتھ ترسیلاتِ زر میں اضافے کا بھی باعث بنے گی۔
