شاہراہوں پر چلنے والی ہر گاڑی کےلیے ای ٹیگ لازمی قرار

ڈی سی اسلام آباد کا کہنا ہے کہ شہر کی شاہراہوں پر چلنے والی ہر گاڑی کےلیے ای ٹیگ لازمی ہو گا۔ ضلعی انتظامیہ کی جانب سے گاڑیوں کے ای ٹیگ اسٹیکرز 18 نومبر سے جاری ہوں گے۔
ڈی سی عرفان میمن کے مطابق 18 نومبر سے شہری مختلف پوائنٹس سے ای ٹیگ اسٹیکرز حاصل کر سکیں گے، شہریوں کو تمام مقررہ پوائنٹس سے متعلق پیشگی آگاہ کیا جائے گا۔
انہوں نے کہا کہ ای ٹیگ اسٹیکرز صرف ضلعی انتظامیہ کے مقررہ پوائنٹس سے لگوائے جا سکتے ہیں، ای ٹیگ کےلیے شہریوں کےلیے گاڑی کارجسٹریشن کارڈ لانا لازمی ہو گا۔ ڈی سی کا کہنا تھا کہ ای ٹیگ اسلام آباد یا دیگر صوبوں سے رجسٹرڈ تمام گاڑیوں پر لازمی ہو گا۔
وفاقی دارالحکومت اسلام آباد میں سیکورٹی خدشات کے پیشِ نظر انتظامیہ اور پولیس نے خصوصی اقدامات کیے ہیں۔
ترجمان اسلام آباد پولیس نے ٹریفک ایڈوائزری جاری کرتے ہوئے کہا ہے کہ دن کے اوقات میں اسلام آباد میں ہیوی ٹریفک کا داخلہ بند ہو گا۔ وفاقی دارالحکومت میں ہیوی ٹریفک کا داخلہ صرف رات 12سےصبح 5 بجے تک ہو گا۔ گاڑیوں پر سیاہ شیشوں کے استعمال پر پابندی رہے گی۔