بھارتی فلم انڈسٹری کے سینئر اداکار دھرمیندر اسپتال سے ڈسچارج

بھارتی فلم انڈسٹری کے سینئر اداکار دھرمیندر کو اسپتال سے ڈسچارج کر دیا گیا ہے، اداکار کے اہل خانہ نے ان کا گھریلو علاج کرانے کا فیصلہ کیا ہے۔
بھارتی میڈیا رپورٹس کے مطابق اسپتال کے ڈاکٹرز کا کہنا ہے کہ دھرمیندر کو صبح 7 بجے اسپتال سے ڈسچارج کردیا گیا ہے، ان کے خاندان کی خواہش کے مطابق ان کا علاج گھر پر جاری رہے گا۔
گزشتہ روز اداکار کی موت کی خبریں سوشل میڈیا پر وائرل ہوگئی تھیں جس کے بعد ان کی اہلیہ اور بیٹی کی جانب سے ردعمل بھی سامنے آیا تھا۔
انڈین میڈیا کی جانب سے دعویٰ کیا جا رہا تھا کہ 89 سالہ اداکار دھرمیندر کو گزشتہ روز بریچ کینڈی اسپتال میں داخل کروایا گیا تھا لیکن وہ آج صبح چل بسے۔تاہم ہیما مالنی نے ان خبروں کی سختی سے نہ صرف تردید کی بلکہ غلط خبریں پھیلانے والے انڈین میڈیا کو بھی تنقید کا نشانہ بنایا۔
ہیما مالنی نے سوشل میڈیا پلیٹ فارم ایکس پر جاری اپنے بیان میں کہا تھا کہ یہ جو کچھ ہو رہا ہے وہ ناقابلِ معافی ہے، ذمہ دار نیوز چینلز ایسے شخص کے بارے میں جھوٹی خبریں کیسے پھیلا سکتے ہیں جو زیرِ علاج ہے اور صحت یاب ہو رہا ہے؟
اداکارہ نے مزید کہا کہ یہ انتہائی بے عزتی اور غیر ذمہ دارانہ عمل ہے، برائے مہربانی ہمارا احترام کریں اور فیملی کی رازداری کا خیال رکھیں۔