فیصل آباد: پاکستان اور جنوبی افریقہ کے مابین سیریز کا تیسرا اور فیصلہ کن ون ڈے کرکٹ میچ آج اقبال سٹیڈیم فیصل آباد میں کھیلا جائیگا۔
پاکستان اور جنوبی افریقہ میں سیریز 1-1 سے برابر ہے۔ اس میدان میں مجموعی طور پر 18 ون ڈے انٹرنیشنل میچز کھیلے جاچکے ہیں۔
پاکستان نے اقبال سٹیڈیم میں 14 ون ڈے انٹرنیشنل میچز کھیلے ہیں جن میں سے 10 جیتے ہیں اور 4 ہارے ہیں۔
جنوبی افریقہ کی ٹیم نے یہاں 7 ون ڈے انٹرنیشنل میچز کھیلے ہیں ان میں سے 3 جیتے ہیں 4 میں اسے شکست ہوئی ہے۔
اس سے قبل دونوں ٹیمیں ٹیسٹ اور ٹی ٹونٹی سیریز کھیل چکی ہیں۔ ٹیسٹ سیریز برابر رہی تھی جبکہ پاکستان نے ٹی ٹونٹی سیریز دو ایک سے جیت لی تھی۔
پاکستان اسکواڈ میں شاہین شاہ آفریدی (کپتان)، ابرار احمد، بابراعظم، فہیم اشرف، فیصل اکرم، فخر زمان، حارث رؤف۔ حسیب اللہ، حسن نواز، حسین طلعت، محمد نواز، محمد رضوان (وکٹ کیپر)، محمد وسیم جونیئر، نسیم شاہ، صائم ایوب اور سلمان علی آغا شامل ہیں۔
واضح رہے کہ جنوبی افریقا نے پاکستان کو دوسرے میچ میں باآسانی 8 وکٹوں سے شکست دے کر تین میچوں کی سیریز 1-1 سے برابر کردی تھی۔
فیصل آباد میں کھیلے گئے دوسرے ون ڈے میچ میں جنوبی افریقا نے پاکستان کی جانب سے دیا جانے والا 270 رنز کا ہدف 40.1 اوورز میں 2 وکٹوں کے نقصان پر حاصل کرلیا تھا۔
