بلوچستان حکومت کا امن و امان کیلیے بڑا فیصلہ

صوبائی حکومت نے بلوچستان میں امن و امان برقرار رکھنے کے لیے بڑا اقدام اٹھا دیا۔
حکومت نے بلوچستان بھر میں ایک ماہ کیلئے دفعہ 144 نافذ کر دی جس کا محکمہ داخلہ نے باضابطہ نوٹیفکیشن جاری کر دیا ہے۔
نوٹیفکیشن کے مطابق جلسے، جلوس، ریلی، 5 یا زائد افراد کے اجتماعات پر پابندی عائد ہو گی جب کہ اسلحہ کی نمائش پر بھی پابندی ہو گی۔
 اس سے قبل یکم اکتوبر کو حکومت بلوچستان نے صوبے بھر کے عوام کے مفاد میں دفعہ 144 نافذ کرتے ہوئے اس کے تحت پوست کے بیج (خشخاش) کی خرید وفروخت پر مکمل پابندی عائد کر دی تھی۔
جاری نوٹیفکیشن کے مطابق صوبہ بھر میں پوست کے بیج (خشخاش) کی نقل وحمل، خرید وفروخت اور خریداری پر فوری اور مکمل پابندی عائد کی گئی تھی۔ یہ پابندی مختلف اضلاع میں پوست کی کاشت کے لیے خشخاش کی خریداری کے پیش نظر لگائی گئی تھی۔
اعلامیہ میں یہ بھی کہا گیا کہ یہ پابندی مفاد عامہ کے تحت لگائی گئی ہے، کیونکہ پوست کے بیج کی خرید وفروخت کے نتیجے میں ممنوعہ منشیات کی غیر قانونی کاشت کو فروغ ملنے کا خدشہ ہے اور اس قسم کی سرگرمیاں نہ صرف عوامی امن وامان کے لیے سنگین خطرہ ہیں بلکہ معاشرے میں منشیات کی لعنت کو مزید پھیلانے کا سبب بھی بن سکتی ہیں۔
اعلامیہ میں کہا گیا کہ اسی خدشہ کے تناظر میں ضابطہ فوجداری کی دفعہ 144 کے تحت صوبے بھر میں فوری طور پر پوست کے بیج کی خریداری پر پابندی نافذ کی گئی ہے، جو اگلے احکامات تک برقرار رہے گی۔