2030 تک گیس کی پیداوار میں 80 فیصد اضافے کی توقع

اس وقت جب دنیا قدرتی گیس کی قلت کا شکار ہو رہی ہے وہیں ایک ملک میں گیس کی پیداوار میں 80 فیصد اضافے کا امکان ہے۔
دنیا اس وقت ایندھن بالخصوص گیس کے بحران کا شکار ہے تاہم خطہ عرب کے سب سے بڑے اور مضبوط ملک سعودی عرب میں 2030 تک قابل فروخت گیس کی پیداوار میں 80 فیصد تک اضافے کی توقع ظاہر کی جا رہی ہے۔
سبق ویب سائٹ کے مطابق سعودی آرامکو کے صدر اور چیف ایگزیکٹو آفیسر انجینئر امین بن حسن الناصر نے کہا ہے 2030 تک قابلِ فروخت گیس کی پیداوار میں تقریباً 80 فیصد اضافہ کی توقع ہے۔ اس میں سے ایک بڑا حصہ غیر روایتی گیس کے جافورہ منصوبے کی توسیع سے حاصل ہوگا جس نے بین الاقوامی سرمایہ کاروں کی خاص توجہ حاصل کی ہے۔
انہوں نے بتایا ہے کہ کمپنی تیل و گیس کی تلاش اور پیداوار کے شعبے میں اپنی صلاحیتوں کو مزید مستحکم کر رہی ہے اور اس سلسلے میں کئی بڑے منصوبے مکمل ہو چکے ہیں یا تکمیل کے قریب ہیں۔
امین بن حسن الناصر کا کہنا تھا کہ 2025 کی تیسری سہ ماہی میں کمپنی کی کارکردگی نے ایک بار پھر یہ ثابت کیا ہے کہ آرامکو عالمی منڈی کی تبدیلیوں سے ہم آہنگ رہنے کی بھرپور صلاحیت رکھتی ہے۔
انہوں نے واضح کیا ہے کہ کمپنی نے معمول اضافی لاگت کے ساتھ پیداوار میں اضافہ کیا جبکہ تیل، گیس اور ان سے متعلق مصنوعات کی فراہمی میں تسلسل اور اعتماد برقرار رکھا جس کے نتیجے میں مالی کارکردگی مضبوط رہی اور سہ ماہی منافع میں نمایاں نمو حاصل ہوئی ہے