وکی پیڈیا کے شریک بانی جمی ویلزنے ’غزہ نسل کشی‘ کا صفحہ ہی بلاک کردیا۔
شریک بانی وکی پیڈیا جمی ویلز نے نرالی منطق اپناتے ہوئے کہا کہ صفحہ غیر جانبداری کے اصولوں کی خلاف ورزی کررہا ہے اور مضمون کا ابتدائی پیراگراف اسرائیل پر نسل کشی کا الزام لگاتا ہے۔شریک بانی وکی پیڈیا جمی ویلز کے فیصلے پر کئی ایڈیٹرز نے سخت تنقید کی ہے۔
ایڈیٹرز کا کہنا ہے کہ اقوام متحدہ اور ماہرین نسل کشی کی رائے کو سیاسی رائے کے برابر رکھنا غلط ہے، سب کی رائے برابر ہوتی تو وکی پیڈیا زمین کی شکل پر بھی تنازع ظاہر کرتا۔
واضح رہے کہ اقوام متحدہ کی رپورٹ کے مطابق اسرائیلی قیادت کے بیانات نسل کشی کا ثبوت ہیں اور دیگر ادارے اسرائیل کی کارروائیوں کو نسل کشی قرار دے چکے ہیں۔
اس سے قبل نائب وزیراعظم اسحاق ڈار نے اسلام آباد میں ایک تقریب سے خطاب کرتے ہوئے کہا تھا کہ غزہ امن معاہدے پر گزشتہ ماہ دستخط ہوئے اور امن کیلیے کوششوں پر عملدرآمد جاری ہے، ہمیں انسانیت کو بچانے کیلیے بھرپور کوششیں کرنا ہوں گی۔
اسحاق ڈار کا کہنا تھا کہ امریکی صدر ڈونلڈ ٹرمپ کی موجودگی میں غزہ امن معاہدے پر دستخط ہوئے، عالمی امن کی کوششوں میں غزہ میں امن کی بات چیت ہوئی۔
انہوں نے مطالبہ دہرایا تھا کہ اسرائیل امریکی صدر ڈونلڈ ٹرمپ کی موجودگی میں ہونے والے غزہ امن معاہدے پر عمل کرے، پاکستان اور دیگر عرب اسلامی ممالک غزہ میں امن کیلیے خلوص نیت سے کوششیں کر رہے ہیں۔
