مصر میں دنیا کا سب سے بڑا میوزیم کھل گیا، جس میں پہلی بار توت عنخ آمون کے مقبرے سے ملنے والے خزانے کی نمائش کی گئی ہے۔
رپورٹس کے مطابق اہرامِ جیزہ کے سائے میں تعمیر ہونے والے گریٹ ایجیپشن میوزیم کا 20 سال بعد افتتاح کر دیا گیا۔ پہلی بار توت عنخ آمون کے مقبرے سے ملنے والے خزانے کو بھی نمائش میں رکھا گیا ہے۔
مصری صدر عبدالفتاح السیسی سمیت دنیا بھر سے 60 ممالک کے رہنماؤں نے اس تقریب میں شرکت کی، جہاں شان دار آتش بازی اور ڈرون شو ہوا۔
اس میوزیم میں ایک لاکھ تک نوادرات کی نمائش کی جائے گی، ان میں کئی وہ خزانے بھی شامل ہیں جو نوعمر بادشاہ توت عنخ آمون کے مقبرے سے ملے تھے۔ انھیں پہلے کبھی عوام کے سامنے نمائش کے لیے پیش نہیں کیا گیا۔
مصری وزیرِ اعظم کا کہنا ہے کہ یہ عجائب گھر مصر کا دنیا کے لیے ایک تحفہ ہے، جس کا مقصد مصری ثقافت کی عظمت اور اثر و رسوخ کو اجاگر کرنا اور کمزور معیشت کو سہارا دینا ہے۔
اس منصوبے پر تقریباً ایک ارب 20 کروڑ ڈالر لاگت آئی ہے، یہاں سالانہ 50 لاکھ سیاحوں کی آمد متوقع ہے۔ یہ مقام 120 ایکڑ پر پھیلا ہوا ہے جو فرانس کے مشہور لوور میوزیم سے دگنا بڑا ہے
