وزیراعلیٰ سہیل آفریدی نے خیبرپختونخوا کی 13 رکنی کابینہ کا اعلان کردیا

وزیراعلیٰ سہیل آفریدی نے 13 رکنی کابینہ کا اعلان کردیا، گورنر خیبرپختونخوا فیصل کریم کنڈی نے وزرا کی سمری پر دستخط کردیے ہیں۔
تفصیلات کے مطابق خیبرپختونخوا کی نئی صوبائی کابینہ کی تشکیل مکمل کرلی گئی ہے، کابینہ میں 10 وزرا، 2 مشیر اور ایک معاونِ خصوصی کو شامل کیا گیا ہے۔
ذرائع کا کہنا ہے کہ گورنر خیبرپختونخوا فیصل کریم کنڈی نے وزرا کی سمری پر دستخط کردیے ہیں، جس کے بعد نئی کابینہ کے ارکان آج سہ پہر 3 بجے گورنر ہاؤس میں حلف اٹھائیں گے۔
ذرائع کے مطابق کےپی ہاؤس اسلام آباد میں بانی پی ٹی آئی کی بہن علیمہ خانم سے ملاقات کے بعد کابینہ کے کئی ناموں میں ردوبدل کیا گیا اور علیمہ خانم کے اصرار پر اسد قیصر کے بھائی عاقب اللہ کو کابینہ میں شامل کیا گیا ہے، جب کہ شاہرام ترکئی کے بھائی فیصل ترکئی کی بھی واپسی ہوگئی ہے۔
ذرائع نے مزید بتایا گیا ہے کہ علی امین گروپ سے تعلق رکھنے والے متعدد وزرا کو کابینہ سے باہر رکھا گیا ہے۔
ذرائع کا کہنا تھا کہ نوشہرہ سے خلیق الرحمان، مردان سے فخرجہاں، کوہاٹ سے آفتاب عالم، خیبر سے عدنان قادری، چارسدہ سے فضل شکور خان، بونیر سے ریاض خان اور سوات سے ڈاکٹر امجد کابینہ کا حصہ بنے ہیں۔
اس کے علاوہ مزمل اسلم اور تاج محمد ترندو کو وزیراعلیٰ کے مشیر مقرر کیا گیا ہے، اور شفیع جان کو معاونِ خصوصی بنایا گیا ہے۔
گورنرکےپی فیصل کریم کنڈی نےوزراکی سمری پر دستخط کردیے ، ، ذرائع گورنر ہاؤس نے بتایا کہ نئی کابینہ کے ارکان آج سہ پہر 3 بجے حلف اٹھائیں گے۔