پی آئی اے کی نجکاری سے قبل 16 ریٹائرڈ ملازمین رل گئے

کراچی : پی آئی اے کی نجکاری سے قبل 16 ریٹائرڈ ملازمین رل گئے، ملازمین کو ستمبر مہینے کی پنشن تاحال ادا نہ ہوسکی۔
تفصیلات کے مطابق پی آئی اے کی نجکاری سے قبل ریٹائرڈ ملازمین کے لیے نیا بحران کھڑا ہوگیا، قومی ایئر لائن کے 16 ہزار ریٹائرڈ ملازمین کو ستمبر کی پنشن تاحال ادا نہیں کی جاسکی۔
ذرائع نے بتایا کہ پنشن کی ادائیگی میں تاخیر کے باعث ریٹائرڈ ملازمین شدید مشکلات کا شکار ہیں، ملازمین کی پنشن کی ذمہ داری پی آئی اے ہولڈنگ کمپنی پر ہے، تاہم تاحال کوئی واضح وجہ سامنے نہیں آئی۔
ذرائع کا کہنا تھا کہ پی آئی اے ہولڈنگ کمپنی کے سی ای او اسد رسول سے مؤقف لینے کے لیے متعدد بار رابطے کی کوشش کی گئی، لیکن انہوں نے جواب دینے سے گریز کیا۔
قومی ایئر لائن ریٹائرڈ ملازمین ایسوسی ایشن کے صدر سید طاہر حسین نے بتایا کہ پنشن کی عدم ادائیگی سے بزرگ ملازمین کو مالی پریشانیوں کا سامنا ہے،’’کئی بار کمپنی سیکریٹری اور چیف فنانس افسر سے رابطہ کیا، مگر کوئی تسلی بخش جواب نہیں ملا۔‘‘
ریٹائرڈ ملازمین نے حکومت اور متعلقہ حکام سے مطالبہ کیا ہے کہ پنشن کی فوری ادائیگی کو یقینی بنایا جائے تاکہ بزرگ شہری مزید مشکلات سے بچ سکیں۔