جمعیت علمائے اسلام (ف) کے سربراہ مولانا فضل الرحمان کا کہنا ہے کہ مجھے اپوزیشن لیڈر بننے میں کوئی دلچسپی نہیں۔
سربراہ جے یو آئی مولانا فضل الرحمان اور چیئرمین پیپلزپارٹی بلاول بھٹو کے درمیان ملاقات ختم ہوگئی جس میں قومی و سیاسی امور پر بات چیت کی گئی اور رابطے جاری رکھنے پر اتفاق کیا گیا۔
بلاول بھٹو نے مولانا فضل الرحمان کو رہاشگاہ آنے کی دعوت دی جسے انہوں نے قبول کرلیا۔
میڈیا سے غیر رسمی گفتگو کرتے ہوئے مولانا فضل الرحمان نے کہا کہ آپ اور والد آصف زرداری آئے، ہم ملاقات کرنے ضرور جائیں گے۔
انہوں نے کہا کہ بلاول کے ساتھ ملاقات خیرسگالی تھی، ایجنڈا میٹنگ نہیں تھی، کسی آئینی ترمیم پر بات نہیں ہوئی، مجھے اپوزیشن لیڈر بننے میں کوئی دلچسپی نہٰں نہ ایسی کوئی بات ہوئی۔
جے یو آئی سربراہ نے کہا کہ معلوم ہے ہمارے پاس کتنے ارکان ہیں، ہم انہی ارکان کے ساتھ اپوزیشن میں رہیں گے۔
صحافی نے سوال کیا کہ پاک افغان امن مذاکرات سے متعلق آپ سے رابطہ کیا گیا تو کردار ادا کریں گے؟ جواب میں انہوں نے کہا کہ مذاکرات کی کامیابی کے لیے اگر سنجیدہ رابطہ کیا گیا تو ہم مثبت جواب دیں گے۔
انہوں نے کہا کہ ملکی مفاد ہماری ترجیح ہے، اسی کے پیش نظر ہی کام کریں گے، پاک افغان کشیدگی دونوں ممالک کے لیے مفید نہیں، رویے شدت کی طرف جارہے ہیں جس میں نرمی اور لچک لانا ہوگی۔
