تل ابیب (25 اکتوبر 2025): امریکا نے اسٹیون فیگن کو غزہ سینٹر کا سویلین سربراہ مقرر کر دیا ہے۔
امریکی محکمہ خارجہ کے مطابق اسٹیون فیگن نئے قائم کردہ سول ملٹری کوآرڈینیشن سینٹر کے سربراہ ہوں گے، جس کا مقصد امریکی صدر ٹرمپ کے بیس نکاتی منصوبے پر عمل درآمد یقینی بنانا ہے۔ یہ سینٹر غزہ میں انسانی امداد کی فراہمی اور امن معاہدے کے نفاذ پر کام کرے گا۔
روئٹرز کے مطابق امریکی محکمۂ خارجہ نے جمعہ کے روز اعلان کیا کہ کیریئر فارن سروس افسر اور یمن میں موجودہ امریکی سفیر، اسٹیون فیگن کو غزہ میں امن معاہدے پر عمل درآمد اور انسانی امداد کی فراہمی کے لیے قائم نئے مرکز کے سِول سربراہ کے طور پر مقرر کیا گیا ہے۔
یہ اعلان اس وقت سامنے آیا جب امریکی وزیرِ خارجہ مارکو روبیو نے اسرائیل کے جنوبی علاقے میں قائم ’’سول۔ملٹری کوآرڈینیشن سینٹر‘‘ کا دورہ کیا اور وعدہ کیا کہ مزید امریکی سفارت کار اس مرکز میں شامل ہوں گے، جہاں پہلے ہی تقریباً 200 امریکی فوجی اہلکار تعینات ہیں۔
یہ مرکز اس ہفتے امریکی سینٹرل کمانڈ کے تحت قائم کیا گیا ہے، اور امریکی فوج کے لیفٹیننٹ جنرل پیٹرک فرینک کو اس کا فوجی سربراہ مقرر کیا گیا ہے۔ فیگن 2022 سے یمن میں امریکا کے سفیر کے طور پر خدمات انجام دے رہے ہیں، تاہم وہ اپنا کام ملک کے باہر سے انجام دیتے ہیں، کیوں کہ یمن اس وقت حوثی حکومت کے زیرِ انتظام ہے، جسے واشنگٹن تسلیم نہیں کرتا۔
