اسلام آباد: وزیراعظم ہاؤس میں پہلی بار دیوالی کی خصوصی تقریب منعقد کی گئی، وزیراعظم نے ہندو برادری کے ہمراہ دیوالی کا کیک بھی کاٹا۔
رہنما نیوز کے مطابق وزیراعظم شہبازشریف کی جانب سے ہندو برادری کو دیوالی کی مبارکباد دی گئی، پہلی بار وزیراعظم ہاؤس میں دیوالی کے حوالے سے تقریب کا بھی انعقاد کیا گیا ہے، شہباز شریف نے دیوالی کی مناسبت سے اپنے پیغام میں کہا کہ پاکستان میں تمام اقلیتوں کو مکمل مذہبی آزادی حاصل ہے۔
وزیراعظم نے کہا کہ دیوالی خوشی، امن اور رواداری کا خوبصورت پیغام ہے، قیام پاکستان سے تعمیر پاکستان تک ہر شعبے میں اقلیتوں کا اہم کردار ہے، تعلیم اور صحت کے شعبے میں اقلیتوں کی نمایاں خدمات ہیں۔
شہباز شریف نے کہا کہ ن لیگ سمیت تمام سیاسی جماعتوں میں اقلیتوں کی نمائندگی موجود ہے، قومی اسمبلی، سینیٹ سمیت تمام اسمبلیوں میں اقلیتوں کی نمائندگی موجود ہے۔
انھوں نے بتایا کہ قومی اقلیتی کمیشن کو مزید فعال کرنے کی منظوری دیدی گئی ہے، نوجوانوں کیلئے خصوصی اسکالرشپس حکومت کی ترجیح ہے۔
وزیراعظم شہبازشریف نے یوتھ پروگرام میں اقلیتی برادری کی شمولیت سے متعلق کہا کہ یوتھ پروگرام کے تحت بھی اقلیتوں کو مواقع فراہم کیے جارہے ہیں، مذہبی تہواروں کیلئے بجٹ میں خصوصی رقم مختص کی گئی ہے۔
ان کا کہنا تھا کہ بجٹ میں اقلیتوں کیلئے خصوصی حصہ مختص کیا گیا ہے، ہمیں پاکستان کی اقلیتی برادری پر فخر اور ناز ہے
