حکومت نے گندم پالیسی 2025-26 کی منظوری دےدی، کسانوں کے تحفظ کو یقینی بنانے کیلئے اسٹریٹیجک اسٹاک کی خریداری کی جائیگی۔
تفصیلات کے مطابق گندم پالیسی کی منظوری دیدی گئی، نئی گندم پالیسی کے تحت کسانوں کو مناسب قیمت دی جائے گی، حکومت مستحکم ذخائر اور کسانوں کے تحفظ کو یقینی بنانے کیلئے اسٹریٹیجک اسٹاک خریدے گی، وزیراعظم شہباز شریف کی زیرصدارت گندم پالیسی 2025-26 سے متعلق اعلیٰ سطح کا اجلاس ہوا۔
اجلاس میں پنجاب، سندھ، بلوچستان، گلگت بلتستان کے وزرائے اعلیٰ نے شرکت کی، وزیراعلیٰ خیبر پختونخوا کے نمائندے، وزیراعظم آزاد کشمیر، متعلقہ اسٹیک ہولڈرز بھی اجلاس میں شریک ہوئے۔
وزیراعظم شہباز شریف نے کہا کہ پاکستان ایک زرعی ملک ہے اور گندم کی فصل کلیدی اہمیت کی حامل ہے، گندم کی فصل کسانوں کےلیے آمدن کا سب سے بڑا ذریعہ ہے۔
انھوں نے کہا کہ حکومت کسانوں کو درپیش مشکلات سے بخوبی آگاہ ہے، کسانوں کی فلاح و بہتری کےلیے ہرممکن کوششیں کی جارہی ہیں، کسان پاکستان کی معیشت میں ریڑھ کی ہڈی کی حیثیت رکھتے ہیں۔
شہباز شریف نے کہا کہ وفاقی حکومت نے تمام اسٹیک ہولڈرز بشمول صوبائی حکومتوں سے مشاورت کی، کسان تنظیموں، صنعتکاروں اور کاشتکار برادری کیساتھ بھی تفصیلی مشاورتی عمل کیا۔
وزیراعظم نے کہا کہ مشاورت کی بنیاد پر حکومت قومی گندم پالیسی 2025-26 کا اعلان کررہی ہے، پالیسی کا مقصد عوامی مفادات کا تحفظ کرتے ہوئے کسانوں کے منافع کو یقینی بنانا ہے۔
انھوں نے کہا کہ اتفاق رائے پر مبنی پالیسی تیار کرنے میں صوبائی حکومتوں کے تعاون کو سراہتے ہیں، انشااللہ یہ پالیسی زرعی ترقی کو فروغ دے گی۔
وزیراعظم شہبازشریف نے کہا کہ پالیسی سے کسانوں کی آمدن میں اضافہ ہوگا، پالیسی پاکستانی عوام کیلئے غذائی تحفظ کو یقینی بنانے میں اہم کردار ادا کرےگی
