جعلی خبروں اور غلط معلومات “انفارمیشن ڈس آرڈر” کا شکار نہ بنیں:فیلڈ مارشل سید عاصم منیر

ایبٹ آباد : فیلڈ مارشل سید عاصم منیر نے پیغام میں کہا ہے کہ جعلی خبروں اور غلط معلومات پر مشتمل “انفارمیشن ڈس آرڈر” کے ذرائع کا شکار نہ بنیں اور ہمیشہ حقائق پر مبنی مؤقف اپنائیں۔
تفصیلات کے مطابق ایبٹ آباد میں پاکستان ملٹری اکیڈمی کاکول میں منعقدہ 152ویں پی ایم اے لانگ کورس کی پاسنگ آؤٹ پریڈ سے خطاب کرتے ہوئے فیلڈ مارشل اور چیف آف آرمی اسٹاف جنرل سید عاصم منیر نے قرآنِ مجید کی سورۃ الصف کی آیت نمبر 4 کا حوالہ دیتے ہوئے کہا “بے شک اللہ اُن لوگوں کو پسند کرتا ہے جو اُس کی راہ میں صف باندھ کر لڑتے ہیں، گویا وہ سیسہ پلائی ہوئی دیوار ہیں۔”
فیلڈ مارشل نے جنوری 1948 کے قائد کے تاریخی ارشادات کا حوالہ دیتے ہوئے کہا ہم سب پاکستانی اور ریاست کے شہری ہیں، ہمیں ریاست کے لیے خدمت، قربانی اور جان دینی چاہیے، ہم اسے دنیا کی سب سے شاندار اور خودمختار ریاست بنا سکیں۔
ان کا کہنا تھا کہ فتح،بیان بازی سے نہیں بلکہ چیلنجوں کا مقابلہ کرنے کیلئے ثابت قدم رہنے سے حاصل ہوتی ہے، پیشہ ورانہ مہارت، نظم و ضبط اور اخلاقی قیادت کا اپنی شخصیت کی پہچان بنانے پر توجہ مرکوز رکھیں۔ْ
آرمی چیف نے کہا کہ بدقسمتی سےپوسٹ ٹروتھ ایرا میں تصورات حقیقت سے زیادہ وزن رکھتے ہیں، آدھے سچ حقائق سے زیادہ تیزی سے پھیلتے ہیں، جعلی خبروں اور غلط معلومات پر مشتمل “انفارمیشن ڈس آرڈر” کے ذرائع کا شکار نہ بنیں،
انھوں نے زور دیا کہ ہمیں چیلنجز کا حوصلے اور عزم کے ساتھ مقابلہ کرنا ہوگا اور یہ ہمارا فرض ہے کہ ہم اپنے ملک کو اس کی صحیح منزل کی طرف لے جائیں۔
فیلڈ مارشل کا مزید کہنا تھا کہ پاکستان کا پرچم انشا اللہ بلند رہے گا کیونکہ اس کے محافظ یعنی پاکستانی قوم کبھی ناکام نہیں ہوتی۔