فوڈ اتھارٹی کا بڑا آپریشن

راولپنڈی : فوڈ اتھارٹی  نے 500 کلو بیمار اور مردہ مرغیوں کا گوشت پکڑلیا  اور  گاڑی کے مالک کے خلاف مقدمہ درج کرکے ایک شخص کو گرفتار کرلیا۔
تفصیلات کے مطابق راولپنڈی میں فوڈ اتھارٹی نے مردہ اور بیمار مرغیوں کی سپلائی کے خلاف کارروائی کرتے ہوئے 500 کلو سے زائد بیمار اور مردہ مرغیوں کو موقع پر تلف کردیا۔
ترجمان نے بتایا کہ کارروائیاں باغ سردراں اور چوا سیداں میں موجود گاڑی اور دکان کے خلاف کی گئیں۔
کارروائی کے دوران گاڑی کے مالک کے خلاف مقدمہ درج کرکے ایک شخص کو گرفتار کیا گیا، جبکہ چکن شاپ کو باسی مرغی رکھنے پر 50 ہزار روپے جرمانہ عائد کیا گیا۔
فوڈ اتھارٹی کا کہنا تھا کہ مردہ مرغی کے گوشت کا کوئی ریکارڈ موجود نہیں تھا، تاہم بروقت کارروائی سے شہریوں کو مضرِ صحت گوشت کھانے سے بچالیا گیا۔
ترجمان نے بتایا کہ صوبے بھر میں مردار اور بیمار مرغیوں کے خلاف سخت کارروائیاں جاری ہیں تاکہ عوام کو محفوظ اور معیاری خوراک فراہم کی جاسکے۔