مودی سرکار نے صدر ٹرمپ کے سامنے گھٹنے ٹیک دئیے

واشنگٹن : مودی سرکار نے صدر ٹرمپ کے سامنے گھٹنے ٹیک دئیے ، بھارتی وزیرِاعظم نریندر مودی نے روس سے تیل نہ خریدنے کی یقین دہائی کرا دی۔
تفصیلات کے مطابق امریکی صدر ڈونلڈ ٹرمپ نے کانفرنس میں انکشاف کیا کہ بھارتی وزیرِاعظم نریندر مودی نے انہیں یقین دہانی کرائی ہے کہ بھارت اب روس سے تیل نہیں خریدے گا۔
صدر ٹرمپ کا کہنا تھا کہ میں بھارت کی جانب سے روسی تیل کی خریداری پر خوش نہیں تھا مگر معاملہ طے ہوگیا ہے، یہ ایک بڑا قدم ہے۔
رائٹرز نیوز ایجنسی کے مطابق امریکی صدر نے کہا کہ اگلا ہدف چین ہے،اس کو اس بات پر آمادہ کرنا ہے۔
امریکی خبر رساں ادارے کے مطابق واشنگٹن ماسکو کی توانائی سے حاصل ہونے والی آمدنی کو روکنے کی کوششیں تیز کر رہا ہے، بھارت اور چین روسی سمندری خام تیل کے دو سب سے بڑے خریدار ہیں، جو یورپی خریداروں کی جانب سے روسی تیل کی خریداری ترک کیے جانے کے بعد کم قیمت پر دستیاب تیل سے فائدہ اٹھا رہے تھے۔
امریکہ و یورپی یونین نے فروری دوہزار بائیس میں یوکرین پر حملے کے بعد ماسکو پر پابندیاں عائد کیں تھیں۔۔
دوسری جانب بھارتی سفارتخانے نے تاحال اس بات کی تصدیق یا تردید نہیں کی کہ وزیراعظم مودی نے صدر ٹرمپ سے ایسی کوئی یقین دہانی کرائی ہے۔
اعداد و شمار کے مطابق ستمبر میں روس نے بھارت کو یومیہ 1.62 ملین بیرل خام تیل برآمد کیا، جو بھارت کی کل درآمدات کا تقریباً ایک تہائی ہےم ماضی میں بھارتی حکام نے امریکی دباؤ مسترد کرتے ہوئے کہا تھا کہ روسی تیل ملکی توانائی کی ضروریات پوری کرنے کے لیے ناگزیر ہے۔
ماہرین کے مطابق بھارت کا یہ فیصلہ واشنگٹن کے ٹیرف اور تجارتی دباؤ کا نتیجہ ہے، صدر ٹرمپ نے رواں سال بھارت کی برآمدات پر 50 فیصد تک اضافی ٹیرف عائد کیا تھا تاکہ نئی دہلی کو روس سے تیل خریدنے سے روکا جا سکے۔
سیاسی مبصرین کا کہنا ہے کہ اگر بھارت واقعی روسی تیل کی درآمدات روک دیتا ہے تو یہ ماسکو کے لیے ایک بڑا معاشی دھچکا ثابت ہوگا اور دیگر ممالک کے فیصلوں پر بھی اثر ڈال سکتا ہے۔