پہلے روز کے اختتام پر ہماری ٹیم اچھی پوزیشن میں ہے

لاہور: پاکستانی اوپنر امام الحق نے ٹیسٹ میچ کے پہلے دن سے متعلق بات کرتے ہوئے کہا ہے کہ پہلے روز کے اختتام پر ہماری ٹیم اچھی پوزیشن میں ہے۔
امام الحق نے میڈیا سے گفتگو کرتے ہوئے کہا کہ 3 وکٹیں اوپر نیچے گریں تو لگا تھا جنوبی افریقا کی ٹیم نے کم بیک کیا ہے، سنچری مکمل نہ ہونے کا دکھ ہوتا ہے مگر یہ کھیل کا حصہ ہے، آغا سلمان اور محمد رضوان کی پارٹنر شپ سے ہم اچھی پوزیشن میں آگئے ہیں۔
پاکستانی بیٹر نے کہا کہ اپنے اچھے کم بیک پرخوش ہوں، ٹیم سے ڈراپ اور واپسی کیریئر کا حصہ ہوتا ہے، لگ رہا ہے تیسرے چوتھے دن گیند بریک ہوگا اور بیٹنگ مشکل ہوگی۔
امام الحق نے مزید کہا کہ 400 سے زائد رنز کرنے میں کامیاب ہوگئے تو اچھی پوزیشن میں آجائیں گے، محمد رضوان اور آغا سلمان میں سے ایک کو سنچری کرنی چاہیے۔
خیال رہے کہ جنوبی افریقا کے خلاف پہلے ٹیسٹ کا پہلا دن پاکستانی بیٹرز کے نام رہا، کھیل ختم ہونے تک قومی ٹیم نے 5 وکٹوں کے نقصان پر 313 رنز بنائے، چار بلے بازوں نے نصف سنچریاں اسکور کیں۔
قذافی اسٹیڈیم لاہور میں کھیلے جارہے ورلڈ ٹیسٹ چیمپئن شپ کے پہلے میچ میں پاکستانی کپتان نے ٹاس جیت پر پہلے بیٹنگ کرنے کا فیصلہ کیا جو بلے بازوں نے درست ثابت کر دکھایا۔
امام، مسعود، رضوان اور سلمان علی آغا نے چاروں نے نصف سنچریاں بنائیں جب کہ امام الحق نورس نائیٹیز کا شکار ہو کر 93 رنز پر چلتے بنے۔