راولپنڈی جڑواں شہروں میں میٹرو بس سروس بند کرنے کا فیصلہ

راولپنڈی جڑواں شہروں میں ممکنہ احتجاج کے پیش نظر شہروں میں چلنے والی میٹرو بس سروس بند کرنے کا فیصلہ کیا گیا۔
 میٹروبس حکام کے مطابق میٹرو بس سروس صدر اسٹیشن تا پاک سیکریٹریٹ تک بند کی جائے گئی، ضلعی انتظامیہ کی ہدایت پر میٹرو بس سروس بند کی جارہی ہے۔
دوسری جانب پنجاب حکومت نے سیکیورٹی خدشات کے پیش نظر اورنج ٹرین کی سروس روک دی، اس سے قبل اورنج لائن کے متعدد اسٹیشنز مسافروں کے داخلے کیلئے بند کردیے گئے تھے۔
سیکیورٹی خدشات کے باعث اورنج لائن کے اسٹیشنز پر پولیس اور سیکیورٹی اہلکار تعینات کیے گئے ہیں۔ ذرائع نے بتایا ہے کہ اورنج لائن ٹرین آج اور کل بند رہے گی۔
یہ اقدام مذہبی سیاسی جماعت کے مارچ کے پیش نظر سیکیورٹی خدشات کی وجہ سے کیا گیا ہے، مذہبی سیاسی جماعت کے احتجاج کی وجہ سے موٹر وے ایم ٹو کو بھی ہر قسم کی ٹریفک کے لئے بند کر دیا گیا ہے۔
انتظامیہ کے مطابق لاہور سے اسلام آباد موٹروے ہر قسم کی ٹریفک کیلئے بند ہے، بابو صابو اور ٹھوکر نیاز بیگ سے موٹروے پر داخلہ بند کر دیا گیا ہے، اسلام آباد لاہور موٹروے بھی ٹریفک کے لئے بند ہے۔
اس کے علاوہ سرینہ چوک، ایکسپریس چوک، نادرا چوک اور میریٹ چوک کو کنٹینر لگا کر بند کر دیا گیا ہے،ریڈ زون کو جانے والے تمام گیٹس کو بھی بند کر دیا گیا۔
رات گئے فیض آباد کو مری روڈ، فیض آباد بس اڈا پر کنٹینرز لگا کر بند کر دیا گیا، زیرو پوائنٹ کو بھی کنٹینر لگا کر بند کر دیا گیا، ایکسپریس وے پر کنٹینرز رکھے گئے لیکن راستہ بند نہیں کیا گیا صرف ایک گاڑی گزر سکتی ہے۔