سندھ حکومت کا ٹائر جلانے اور پائرو لائسز پلانٹس پر مکمل پابندی کا فیصلہ

کراچی : سندھ حکومت نے ٹائر جلانے اور پائرو لائسز پلانٹس پر مکمل پابندی کا فیصلہ کرلیا، ٹائر جلانے سے سانس، دل اور اعصابی امراض میں اضافہ دیکھا جا رہا ہے۔
تفصیلات کے مطابق سندھ حکومت نے صوبے بھر میں ٹائر جلانے اور پائرو لائسز پلانٹس کے آپریشن پر پابندی عائد کر دی ہے۔
یہ فیصلہ وزیراعلیٰ سندھ کی زیر صدارت ہونے والے صوبائی کابینہ کے اجلاس میں کیا گیا۔
سیکریٹری ماحولیات نے بتایا کہ ٹائر جلانے اور ناقص پلانٹس کے باعث فضا، مٹی اور پانی بری طرح متاثر ہو رہے ہیں جبکہ ٹائر جلانے سے سانس، دل اور اعصابی امراض میں اضافہ دیکھا جا رہا ہے، جب کہ پائرو لائسز جیسے خطرناک عمل نے کراچی کی فضائی آلودگی کو خطرناک سطح تک پہنچا دیا ہے۔
سیکریٹری ماحولیات کا کہنا تھا کہ عوامی صحت کے تحفظ کے لیے ایسے تمام پلانٹس کو فوری طور پر بند کرنے کا فیصلہ کیا گیا ہے تاکہ ماحولیاتی آلودگی پر قابو پایا جا سکے۔
سندھ حکومت نے اس فیصلے پر عمل درآمد کے لیے نئے ضابطے تیار کر لیے ہیں جنہیں “سندھ انوائرمنٹل پروٹیکشن ایجنسی (پابندی بر استعمالِ ناقص ایندھن/ٹائرز) رولز 2025” کا نام دیا گیا ہے۔ ان ضوابط کے تحت ناقص ایندھن، ٹائر آئل اور دیگر خطرناک ضمنی مصنوعات کے استعمال، تیاری اور فروخت پر مکمل پابندی عائد ہو گی۔
ڈرافٹ کے مطابق تمام فیول پراسیسنگ اور ری سائیکلنگ پلانٹس کو لائسنس حاصل کرنا، اخراج کنٹرول سسٹم نصب کرنا اور ماحولیاتی معیار پر پورا اترنا لازمی ہوگا۔ خلاف ورزی کی صورت میں بھاری جرمانے، آلات کی ضبطی اور یونٹس کی مستقل بندش جیسے اقدامات کیے جائیں گے۔