آئی ڈی ایف نے غزہ شہر کی طرف لوٹنے والے فلسطینیوں کو وارننگ دے دی

اسرائیلی دفاعی فورسز (آئی ڈی ایف) نے فوجی کارروائیاں رکنے کے بعد غزہ شہر کی طرف لوٹنے والے فلسطینیوں کو وارننگ دے دی۔
ٹائمز آف اسرائیل کی رپورٹ کے مطابق آئی ڈی ایف نے فلسطینیوں کو خبردار کیا کہ وہ غزہ شہر کی طرف نہ لوٹیں اور ایسی جگہوں سے دور رہیں جہاں فوجی دستے موجود ہوں۔
آئی ڈی ایف کے عربی زبان کے ترجمان کرنل اویچے ادرائی نے اپنے بیان میں کہا کہ اسرائیلی دفاعی فورسز کے دستے اب بھی غزہ شہر کو گھیرے میں لیے ہوئے ہیں لہٰذا وہاں واپس جانا انتہائی خطرناک ہے۔
کرنل اویچے ادرائی نے کہا کہ شمال کا علاقہ ایک خطرناک جنگی زون ہے، آپ کی حفاظت کیلیے شمال کی طرف واپس جانے یا غزہ پٹی کے کسی بھی حصے میں حتیٰ کہ اس کے جنوب میں بھی جہاں آئی ڈی ایف کے دستے موجود ہیں جانے سے گریز کریں۔
آئی ڈی ایف کی جانب سے مذکورہ وارننگ ایک ایسے وقت میں آئی ہے جب فلسطینی مزاحمتی تنظیم حماس نے امریکی صدر کے مجوزہ غزہ امن منصوبہ قبول کیا ہے جبکہ ڈونلڈ ٹرمپ نے اسرائیل کو غزہ میں فوری طور پر فوجی کارروائیاں روکنے کا حکم دیا ہے۔