امریکی بحری جہاز دو روزہ دورے پر کراچی بندرگاہ پہنچ گیا

امریکی بحری جہاز یو ایس ایس وین ای میئر 2 روزہ دورے پر کراچی بندرگاہ پہنچ گیا ہے۔ کراچی آمد پر پاک بحریہ کے سینیئر حکام نے امریکی جہاز کے عملے کا پرتپاک استقبال کیا۔ اس موقعے پر امریکا کے ناظم الامور اور امریکی قونصل خانے کے نمائندے بھی موجود تھے، جنہوں نے دوطرفہ بحری تعلقات کی اہمیت پر زور دیا۔ ترجمان پاک بحریہ کے مطابق دورے کے دوران امریکی نیوی کا عملہ مختلف پیشہ ورانہ سرگرمیوں، تربیتی سیشنز اور مشترکہ مشقوں میں شرکت کرے گا جن کا مقصد دونوں بحری افواج کے درمیان تعاون کو فروغ دینا اور تجربات کا تبادلہ ہے، یہ 2 روزہ دورہ شمالی بحیرۂ عرب میں بحری مشق پر اختتام پذیر ہوگا جس میں یو ایس ایس وین ای۔ میئر اور پاک بحریہ کے جہاز مشترکہ طور پر حصہ لیں گے