وفاقی دارالحکومت میں بغیر ڈرائیونگ لائسنس کے گاڑی چلانے والوں کے خلاف سخت اقدامات کیے جانے کا فیصلہ کرلیا گیا ہے۔
پولیس ذرائع کے مطابق یکم اکتوبر سے بغیر ڈرائیونگ لائسنس گاڑی چلانے پر سخت کارروائی ہوگی اور مقدمات درج کرکے ملزمان کو گرفتار کیا جائے گا۔ یہ کارروائی پرائیویٹ یا سرکاری گاڑی چلانے والوں کے لیے بلا تفریق ہوگی۔
آئی جی اسلام آباد علی ناصر رضوی نے ٹریفک پولیس کو واضح ہدایات جاری کی ہیں کہ وہ اس معاملے میں کوئی رعایت نہ برتے۔ اس کے علاوہ سرکاری ڈرائیورز کی سہولت کے لیے ان کے دفاتر میں ڈرائیونگ لائسنس بنوانے کی بھی سہولت فراہم کی گئی ہے۔
پولیس کا کہنا ہے کہ یکم اکتوبر کے بعد بغیر لائسنس گاڑی یا موٹرسائیکل چلانے والے ڈرائیور اور گاڑی دونوں تھانے میں بند کیے جائیں گے۔ اس کے علاوہ لائسنس حاصل کرنے تک کریکٹر سرٹیفکیٹ بھی جاری نہیں کیا جائے گا۔
مزید یہ کہ گرفتار نجی یا سرکاری ڈرائیور کی شخصی ضمانت بھی ممکن نہیں ہوگی۔ بغیر ڈرائیونگ لائسنس گاڑی یا موٹرسائیکل چلانے والوں کو کم از کم ایک رات حوالات میں گزارنی ہوگی۔
