وزیراعظم شہباز شریف نے کہا ہے کہ پاکستان میں ہونے والی دہشتگرد کارروائیوں میں بھارت کا کردار واضح ہے، جبکہ افغان حکومت دہشتگرد عناصر کو روکنے میں ناکام رہی ہے۔
بلوچستان نیشنل ورکشاپ کے شرکا سے خطاب کرتے ہوئے وزیراعظم نے کہا کہ بلوچستان رقبے کے لحاظ سے پاکستان کا سب سے بڑا جبکہ آبادی کے اعتبار سے سب سے چھوٹا صوبہ ہے۔ انہوں نے کہا کہ بلوچستان کی قیادت نے ہمیشہ قومی مفاد کو ترجیح دیتے ہوئے وفاق کا ساتھ دیا، جبکہ صوبے کے عوام نے پاکستان کی تشکیل میں اہم کردار ادا کیا۔
وزیراعظم کا کہنا تھا کہ دہشتگردی کے خلاف جنگ میں 90 ہزار افراد اپنی جانیں قربان کر چکے ہیں۔ انہوں نے مستونگ میں سیشن جج کے قتل کا ذکر کرتے ہوئے کہا کہ بلوچستان کے عوام کی قربانیاں کبھی رائیگاں نہیں جائیں گی۔
شہباز شریف نے کہا کہ ملک میں دہشتگردی کا مکمل خاتمہ ہو چکا تھا، تاہم ایک منظم سازش کے تحت دہشتگردی دوبارہ سر اٹھانے لگی۔ انہوں نے زور دیا کہ دہشتگردی کا مقابلہ پوری قوم کو متحد ہو کر کرنا ہوگا۔
انہوں نے مزید کہا کہ پاکستان کو حالیہ عرصے میں اہم کامیابیاں حاصل ہوئی ہیں اور خطے میں امن کے لیے پاکستان کی سفارتی کوششوں کو عالمی سطح پر سراہا جا رہا ہے۔ وزیراعظم نے ملک کی ترقی کے لیے چاروں صوبوں کی مشترکہ کاوشوں کی اہمیت پر بھی زور دیا۔
