لاہور: سینٹر پارک سے قصور جانے والی سڑک پر گیٹ نمبر 2 کے قریب پیش آنے والے ٹریفک حادثے میں دو سگے بھائی جان کی بازی ہار گئے۔
ترجمان ٹریفک پولیس کے مطابق بارش کے باعث موٹر سائیکل بے قابو ہو کر فٹ پاتھ سے جا ٹکرائی، جس کے نتیجے میں دونوں نوجوان موقع پر ہی جاں بحق ہو گئے۔
جاں بحق ہونے والوں کی شناخت 18 سالہ حمزہ ولد عارف اور 16 سالہ حسن ولد عارف کے نام سے ہوئی ہے۔ دونوں بھائی لاہور سے قصور جا رہے تھے۔
حادثے کی اطلاع ملتے ہی ٹریفک پولیس اور ریسکیو اہلکار موقع پر پہنچ گئے۔ ابتدائی تحقیقات کے مطابق حادثہ بارش کے دوران سڑک پر پھسلن کے باعث موٹر سائیکل کا توازن بگڑنے سے پیش آیا۔
چیف ٹریفک آفیسر (سی ٹی او) لاہور سید عبدالرحیم شیرازی نے واقعے پر گہرے رنج و غم کا اظہار کرتے ہوئے شہریوں سے اپیل کی ہے کہ بارش کے موسم میں موٹر سائیکل احتیاط سے چلائیں، رفتار مناسب رکھیں اور ہیلمٹ کا لازمی استعمال کریں۔
انہوں نے مزید ہدایت کی کہ پھسلن والی سڑکوں پر تیز رفتاری اور خطرناک اوورٹیکنگ سے گریز کیا جائے تاکہ قیمتی جانوں کو حادثات سے محفوظ رکھا جا سکے۔
