سندھ میں کم عمری کی شادیوں سے متعلق اہم اعداد و شمار سامنے آئے ہیں، جن کے مطابق 24.7 فیصد خواتین کی شادی 18 سال کی عمر سے پہلے ہوئی، جبکہ 7.5 فیصد کی شادی 15 سال کی عمر سے پہلے کردی گئی تھی۔
نیشنل کمیشن آن دی رائٹس آف چائلڈ کی جانب سے یونیسف کے تعاون سے تیار کردہ رپورٹ ’’دی اسٹیٹ آف چلڈرن اِن پاکستان 2024‘‘ میں بتایا گیا ہے کہ سندھ میں کم عمری کی شادیوں کا رجحان خواتین کے مقابلے میں مردوں میں کم ہے۔ رپورٹ کے مطابق 18 سال سے پہلے شادی کرنے والے مردوں کی شرح 8.5 فیصد، جبکہ 15 سال سے پہلے شادی کرنے والوں کی شرح 2.2 فیصد رہی۔
رپورٹ میں کم عمری کی شادیوں کی وجوہات میں غربت، تعلیم کے محدود مواقع، معاشرتی توقعات اور صنفی عدم مساوات جیسے عوامل کی نشاندہی کی گئی ہے۔ اس تحقیق میں پنجاب، سندھ، خیبرپختونخوا اور بلوچستان سے تعلق رکھنے والے مختلف سماجی پس منظر کے 400 سے زائد مردوں، خواتین، لڑکوں، لڑکیوں اور متعلقہ افراد کے انٹرویوز اور گروپ مباحثوں سے معلومات حاصل کی گئیں۔
رپورٹ میں سندھ سے متعلق خواتین کے اعداد و شمار ملٹی پل انڈیکیٹر کلسٹر سروے 2018-19 پر مبنی ہیں، اس لیے انہیں 2026 میں کم عمری کی شادیوں کی موجودہ شرح قرار نہیں دیا جا سکتا۔
