دہشتگردی کی کارروائیوں میں ملوث سعودی شہری سلطان بن عامر الشھری کی سزائے موت پر عمل درآمد

سعودی عرب میں وزارت داخلہ نے دہشتگردی کی کارروائیوں میں ملوث سعودی شہری سلطان بن عامر الشھری کی سزائے موت پر عمل درآمد کرادیا۔
سعودی خبر رساں ادارے کی رپورٹ کے مطابق سعودی وزارت داخلہ کا کہنا ہے کہ سعودی شہری سلطان الشھری کو بیرونی دہشتگرد تنظیم کے ساتھ رابطہ رکھنے اور دھماکہ خیز مواد تیار کرنے کے الزام میں گرفتار کیا گیا تھا۔
رپورٹس کے مطابق دوران تحقیقات انکشاف ہوا کہ ملزم نے قانون کو مطلوب افراد کو پناہ بھی دی تھی جس پر اس کے خلاف مقدمہ دائر کر کے فوجی عدالت میں سماعت کی گئی۔ عدالت میں جرم ثابت ہونے پر اسے سزائے موت کا حکم سنایا۔
ابتدائی عدالت کے فیصلے کے خلاف اپیل کورٹ سے بھی رابطہ کیا گیا جہاں جرم کی سنگینی کو دیکھتے ہوئے ابتدائی سزا کے فیصلے کو برقرار رکھا گیا۔
واضح رہے کہ گزشتہ روز بھی منشیات اسمگل کرنے پر تین سعودی شہریوں پر سزائے موت کا فیصلہ نافذ کر دیا گیا تھا۔
وزارت داخلہ کا اپنے بیان میں کہنا تھا کہ سعودی شہری سعود الرویلی مساعد الاشجعی اور خالد الحازمی کو منشیات اسمگل کرتے ہوئے حراست میں لیا گیا تھا۔
سعودی عرب میں بارش کا الرٹ، کون سے علاقے متاثر ہوں گے؟
وزارت کے مطابق تمام ثبوت اور دلائل کے ساتھ ملزمان کو عدالت میں پیش کیا گیا جہاں الزام ثابت ہونے اور زمین میں فساد پھیلانے پر سزائے موت کا فیصلہ سنا دیا گیا۔
رپورٹس کے مطابق بعد ازاں اپیل کورٹ نے زریں عدالت کے فیصلے کی تصدیق کی اور ایوان شاہی نے فیصلے پر عملدرآمد کی منظوری دی ہے۔