جمعیت علمائے اسلام (ف) نے مرکزی مجلسِ شوریٰ کا اجلاس 18 اور 19 اکتوبر کو اسلام آباد میں طلب کرلیا ہے۔ ترجمان جے یو آئی اسلم غوری کے مطابق اجلاس جماعت کے سربراہ مولانا فضل الرحمان کی صدارت میں ہوگا۔
ترجمان کے مطابق اجلاس کے ایجنڈے میں خیبرپختونخوا میں گورنر راج اور ایمرجنسی کے نفاذ کا معاملہ سرفہرست ہوگا، جبکہ ملکی سیاسی صورتحال، وفاقی اور صوبائی حکومتوں کی کارکردگی اور مستقبل کے سیاسی فیصلوں پر بھی غور کیا جائے گا۔
اجلاس میں مشرقِ وسطیٰ کی صورتحال، بالخصوص حرمین شریفین سے متعلق امور، مہنگائی، بے روزگاری اور عوامی حقوق کے معاملات کا جائزہ بھی لیا جائے گا۔ اس کے علاوہ جماعت کی جاری تحریک اور آئندہ کے لائحہ عمل پر مشاورت کی جائے گی۔
ترجمان کے مطابق اجلاس میں ملک بھر سے مرکزی مجلسِ شوریٰ کے اراکین شرکت کریں گے۔
